NO CONCELLO: OS VERTEDOIROS

O BNG de Sober presentou no Concello o 5 de Xullo a seguinte MOCIÓN:

ANTECEDENTES

Ó longo de todo o territorio do termo municipal de Sober aparecen acumulacións de lixo de diferente tamaño, composición e antigüidade; acumulacións de lixo situadas á beira de camiños, no monte, á beira dos ríos e regatos e outros lugares.

Estes vertedoiros, dos cales hai centos, contaminan o solo; podendo contaminar, segundo o tipo de residuos, ríos e regatos con productos tóxicos.

Ademáis, afean a paisaxe, sendo incompatible a existencia destes vertedoiros ca dimensión turística do Concello.

Por outra parte, os restos poden ser perigosos para sendeiristas, ciclistas ou nenos que xoguen nas súas inmediacións.

Por todo o anterior, realízase a seguinte MOCIÓN:

O Pleno do Concello de Sober acorda:

1. que se realice un inventario exhaustivo, por parroquias, dos vertedoiros existentes no Concello de Sober.

2. que se consulte con expertos en Medio Ambiente sobre a solución que se lle debe dar a cada vertedoiro.

3. que se proceda á recollida selectiva dos restos reciclables e ó selado dos vertedoiros segundo o ditame dos expertos.

A Moción foi incluída na orde do día do Pleno celebrado o 19 de Xullo de 2007, sendo defendida por Alfonso Campos.

A Alcaldesa-Presidenta respondeu que se fixeron moitos esforzos na concienciación, con campañas para separar o lixo e información sobre a recollida de grandes restos. Alegou que a Moción era irrealizable por cuestión de financiamento. Só en recollida de lixo do conainer verde se recaudan 1.600 € e se gastan 6.000 €. Polo tanto, a Alcaldesa-Presidenta cre que hai que seguir ca concienciación e, en todo caso, se o BNG entrega ó Concello o inventario de vertedoiros que ten feito, o Concello pode ir eliminándoos paulatinamente.

O voceiro do PSOE recoñeceu o valor da concienciación e aportou a idea de controlar os vertidos ilegais de lixo facendo partícipes ás parroquias na vixianza e na eliminación dos vertedoiros.

O BNG retira a moción e ofrece a súa colaboración para entregar ó Concello a localización de todos os vertedoiros que vaia localizando.

___

En todo caso, o BNG de Sober vai demostrar que con poucos medios (un GPS, unha cámara dixital) se pode sinalizar os vertedoiros.

Para selalos, evidentemente, o Concello precisa de financiación de outras administracións.

Recoñecendo o difícil que é concienciarnos a todos de que o lixo non se tira por aí, esto non é escusa para que o Concello non tivese realizado ningunha acción importante para acabar cos vertedoiros, de feito, cremos que o Concello e a maior parte dos veciños (nos que nos incluimos) non somos conscientes da magnitude do problema: a pouco que te alexes dos camiños aparecen montóns de lixo.

O BNG seguirá sinalizando os puntos con vertedoiros, colaborará co Concello entregándolle esta catalogación e fará campañas de sensibilización sobre o problema.