BNG SOBER

PLENOS XANEIRO-SETEMBRO 2009

2009-11-03T14:20:00.007+01:00

PLENO – 19 – XANEIRO – 2009

Sesión extraordinaria.
Renuncia de Raquel Arias ao cargo de Alcaldesa do Concello de Sober pola imposibilidade de compatibilizar este co de candidata ás eleccións ao Parlamento de Galicia. Non renuncia ao cargo de concelleira.

PLENO – 29 – XANEIRO – 2009
Sesión extraordinaria.
Elección de novo Alcalde. José Gómez é elixido Alcalde de Sober cos 8 votos do Partido Popular.

PLENO – 31 – XANEIRO – 2009
Sesión ordinaria.
Sorteo dos membros das mesas electorais para as eleccións ao Parlamento de Galicia do 1 de Marzo de 2009.
O BNG formula dous rogos á Alcaldía:
1. Que dende o Concello se poñan os medios axeitados para limpar os vertedoiros incontrolados (ver "Os mil e un vertedoiros do Concello de Sober").
2. Que se arranxen os postes da luz que, debido ao pasado temporal, están a caer.

PLENO – 11 – FEBREIRO – 2009
Sesión extraordinaria.
Repetición do sorteo de dous suplentes en dúas mesas electorais.

PLENO – 13 – MARZO – 2009
Sesión ordinaria.
Aprobación da conta xeral de 2007, cos votos a favor do PP e a abstención dos grupos da oposición.
Aprobación das dietas dos concelleiros sen adicación exclusiva nin parcial por asistencia a órganos colexiados:
- 120 € por asistencia ás sesións da Xunta de Goberno (asisten o Alcalde e os tres Tenentes de Alcalde; as sesións ordinarias son dúas ao mes). - 100 € por Plenos e Comisións Informativas do Pleno. - O Alcalde cobrará 725 € por asistencia ás sesións dos órganos colexiados, e non poderá cobrar máis que dúas asistencias ao mes (as dúas das Xuntas de Goberno), é dicir, 1450 € ao mes.
O BNG formula a seguinte pregunta:
- ¿Que espazo acota un sinal feito a man que limita o paso a 30 km hora en Rosende?
Alfonso Campos Pérez formula a seguinte solicitude de melloras turísticas (ver aquí).
Xesús Verao Pérez roga que se corrixan as deturpacións nos nomes dos miradoiros e lugares, algo desfeito dende os despachos.

PLENO – 12 – Maio – 2009
Sesión extraordinaria.
Sorteo de membros de mesas electorais para as eleccións ao Parlamento Europeo 2009.
Renuncia ao cargo de concelleira de Raquel Arias Rodríguez.

PLENO – 30 – Maio – 2009
Sesión ordinaria.
Toma de posesión do cargo de nova concelleira de Ángeles Illanes Pérez.
Recoñecemento extraxudicial de créditos: o Concello acometeu no exercicio orzamentario de 2008 determinados gastos para os que non había consignación orzamentaria, polo cal estes se inclúen no Orzamento de 2009. O BNG manifestou que houbo falta de previsión por parte do goberno local.
Aprobación da Ordenanza Municipal de Axuda a Domicilio (consultar o BOP nº 177).

PLENO – 30 – Xuño – 2009
Sesión extraordinaria.
Aprobación do Orzamento Xeral para 2009, cos votos a favor dos concelleiros do PP e os votos en contra da oposición.

Os Orzamentos Xerais do Concello de Sober para o ano 2009 ascenden a 2.412.527,02 €. [Aumentaron en 738.864,84 € con respecto a 2008; un 44% máis, aumento debido ao FEIL]. - Presuposto de INGRESOS. O maior volume de ingresos provén, coma o ano pasado, do capítulo de TRANSFERENCIAS CORRENTES (1.041.014,02 € - 43% aprox.). Como xa dixemos o ano pasado, a importancia das transferencias de outras entidades evidencia a falta de autofinanciamento das entidades locais [en Sober esto evidénciase na necesidade de recurrir a créditos para afrontar gastos habituais, coma o aprobado no último pleno] e a necesidade de reformar o actual sistema municipal (que prima ás cidades grandes), contemplando na financiación dos concellos variables coma a dispersión poboacional do noso país, o avellentamento ou a extensión territorial do municipio. As OPERACIÓNS DE CAPITAL aumentan dende os 244.483,94 € de 2008 ós 807.157 € de 2009, correspondendo este aumento, sobre todo, o aumento das transferencias de capital do Estado, que en 2009 ascenden a 557.250 € (FEIL). A recadación do imposto sobre actividades económicas reduciuse dende os 40.200 € de 2008 ós 5.200 € de 2009. - Presuposto de GASTOS. O maior volume de gastos absórveo o capítulo de PERSOAL (50% de gastos do Concello), que aumenta con respecto a 2008. Os gastos correspondentes a ALTOS CARGOS aumentan dende 17.373,84 € a 45.000 €.

PLENO – 13 – AGOSTO – 2009
Sesión ordinaria.
Toma de poseseión do cargo de nova concelleira de Mª Carmen Agrelo Vázquez.
O PP pervirte o espíritu democrático do Pleno aplazando mocións, rogos e preguntas presentadas en tempo e forma pola Oposición (ver aquí).

PLENO – 30 – SETEMBRO – 2009
Sesión ordinaria.
Mocións do BNG.
- Pola gratuidade dos libros de texto (aquí).
- Polo mantemento do proxecto de extensión da banda larga mediante tecnoloxía WIMAX no sur de Lugo (aquí).

ACORDOS NA XUNTA DE GOBERNO LOCAL

* Aprobación dun convenio ca Deputación Provincial de Lugo para a subvención por parte desta administración dos gastos derivados das actuacións do Fondo Especial do Estado.
* Aprobación das obras a financiar con cargo ao FEIL (ver aquí).
* Mellora da rede viaria en: Sobreira, Sante, Igrexa de Bulso, Lamas de Abaixo, Pipín, Outeiro, Viladime, Gandarela, Viloudriz, Vilamaior, Figueiroá, Rosende, Xuncal e Cuñas de Abaixo.

A FESTA EN FOTOS

2009-10-19T20:38:00.001+02:00

I FESTA NACIONALISTA DA RIBEIRA SACRA

2009-09-30T22:44:00.004+02:00

* Prema AQUÍ para coñecer os detalles.

GALIZA COMO TALLADA

2009-09-09T13:24:00.001+02:00

... poderes económicos e políticos que, en medio século, expropriáronnos os "ríos esquecidos"e espoliaron os nosos recursos enerxéticos fósiles, esgotando en dous decenios os lignitos pardos d"As Pontes e Meirama. Nas mans dos depredadores e os seus cómplices cipaios, aquel noso potencial enerxético, no canto de enxendrar un desenvolvemento endóxeno racionalizado e sustentábel, agravou a "extraversión" da nosa economía e acelerou o perverso síndrome do "crecemento cara fóra", é dicir, os andacios do mundo subdesenvolvido que diagnosticaran os latinoamericáns Furtado, Pinto, Sunkel e demáis, poucos anos antes de escribir o Valentín o seu libro -e que il ben coñecía, por certo. Medio século perdido, viaxándomos de recú. Baixo o fascismo e sen autonomía, primeiro; en "democracia" e con "autoanemia", despois. E agora o vento, tamén. Disque o vento é noso -tamén o eran os ríos e os lignitos- mais os muíños do vento, certamente, non. A parte nacionalista do bipartito tentou dárllelos cando menos ao destinatario xordo indíxena, e mesmo obter un quiñón para a xente do común. Chegou o espolique do Galán, e restituíulles o "dominio eminente" aos depredadores. Canto ao destinatario xordo favorecido no intento (bi)partito e axiña desposuído na restitución aos amos da terra, ese pasou a facerse o mudo tamén: nin cando o atracan se defende.

Ai, Valentín! Se por acaso resucitases, seguro que retornabas de imediato á túa cova, a proseguir os teus paliques con "Un Ollo de Vidro", o alter ego do Daniel no alén. Estes de agora non saben nin quen eran un e outro. Dicímosllelo, só por amolar?: os que, coma ti e tantos outros de lei, asumiron Galiza como tarefa colectiva de emancipación aberta ao protagonismo popular como auténtico destinatario das súas mensaxes liberadoras. Non coma estes, que encarnan a antítese desa angueira liberadora. Istes que, ben claro está, só cobizan a Galiza como tallada: o natural e propio do carnívoro depredador.

Xosé Manuel Beiras en Galiza Hoxe (ler o artigo completo aquí).

OPERACIÓN PANDEMIA

2009-08-22T15:24:00.004+02:00

2009-08-17T16:18:00.001+02:00

TEMOS DEREITO A FACER OPOSICIÓN

2009-08-13T21:35:00.007+02:00

O PP de Sober pervirte o espíritu democrático do Pleno aprazando mocións, rogos e preguntas presentadas en tempo e forma pola Oposición. Ademáis, a Alcaldía non aceptou incluír na orde do día do Pleno de hoxe unha Moción do BNG sobre a anulación por parte da Xunta de Galiza da instalación da rede WIMAX.

O BNG de Sober presentara no rexistro do Concello do 7 de Xullo pasado unha Moción para instar á Xunta de Galiza a garantir a gratuidade dos libros de texto e do material curricular no vindeiro curso académico, pero esta Moción non se puido debater porque a Alcaldía decidiu adiar, sen dar explicacións convincentes, todas as Mocións, Preguntas e Rogos presentados en tempo e forma pola Oposición ata o vindeiro Pleno.

Ademáis, no Pleno de hoxe, Alfonso Campos Pérez, voceiro do BNG, sinalou que quería presentar unha Moción para instar á Xunta de Galicia a manter a extensión da rede de banda larga no sur de Lugo, cumprindo ca empresa adxudicataria os termos do contrato, é dicir, poñendo a disposición da empresa as infraestruturas comprometidas para instalar as antenas WIMAX e que se lle fixe un prazo curto, que non vaia máis alá de setembro, para a posta en servizo de internet e teléfono aos prezos convidos, isto é: 30 € como máximo por unha conexión normal, 55 € como máximo por 6 MG, e servizo telefónico por 18 € ao mes. A Alcaldía non aceptou que se debatese hoxe ningunha Moción, a pesar de tratar a do BNG sobre un asunto tan importante e urxente como é a posibilidade de ter un bo servizo de banda larga nesta zona, servizo imprescindíbel para os empresarios do rural, as mozas e mozos, o turismo a cidadanía en xeral e particularmente para os maiores, aos que doutro xeito é imposíbel darlles un unha atención por teleasistencia que precisan de xeito perentorio.

Ante a intransixencia do PP, o voceiro do BNG de Sober esixiu que a partir de agora se atendan ao día as iniciativas da Oposición, pois é fundamental para garantir o control democrático do Goberno, labor para a que a cidadanía nos elixiu. O BNG considera que é unha fraude aos votantes convertir os Plenos en puro trámite.

NON MÁIS ENCOROS

2009-08-07T11:39:00.002+02:00

O BNG reclama a declaración dos ríos galegos libres de novos aproveitamentos hidroeléctricos

Unha delegación de cargos institucionais do BNG, integrada polas deputadas no Parlamento galego e nas Cortes (Isabel Sánchez e Olaia Fernández), polo senador, Xosé Pérez Bouza, e pola eurodeputada Ana Miranda desprazáronse hoxe até o encoro de San Estevo de Ribas do Sil para denunciar a indefinición do actual goberno da Xunta na defensa dos cauces galegos, nomeadamente os da conca Miño-Sil, e reclamar a revisión do Plan Sectorial Hidroélectrico para declarar os ríos do País libres de futuros aproveitamentos.

Os representantes nacionalistas advertiron do perigo no que se atopan na actualidade os ríos de Galiza, sobre todo ante a ameaza inminente de adxudicar novos aproveitamentos hidroeléctricos, malia recoñecer a propia consellaría de Medio Ambiente que “existe saturación”.

Lembraron que a posición do BNG a este respeito sempre foi unha opinión crítica con esta política, reclamando racionalidade nos usos e apostando por unha práctica respetuosa que teña como elemento cardinal dotar de racionalidade a explotación das augas e a preservación do seu valor medioambiental.

Neste sentido, a deputada no Parlamento galego Isabel Sánchez anunciou que instará ao goberno da Xunta a que redacte un Plan de Usos da Rede Natura que permita elaborar informes que sexan vinculantes no Estado, unha proposta que tamén será levada ao Parlamento Europeo por Ana Miranda, co obxecto de que a Comisión de Medio Ambiente tome cartas no asunto e obrigue ao goberno español a que todas as Comunidades teñan redactado os ditos Planes de Usos.

Pola súa parte, o senador, Xosé Pérez Bouza anunciou que demandará as competencias sobre a xestión da Confederación Hidrográfica Miño-Sil, pois dende Galiza poderáse defender mellor os intereses dos seus ríos, “sempre e cando haxa máis sensibilidade da que está a demostrar o actual goberno co este asunto”, ironizou.

A este respeito, pediulle a Feijóo menos abrazos co presidente de Iberdrola e máis protección dos cauces galegos, o que pasa pola paralización de novos encoros nesta conca.

Asemade, adiantou que, á vista da desfeita causada por Iberdrola nas obras que está a realizar en San Estevo, co conseguinte secado dun tramo do río e que “nin se dignaron a retirar os casacallos” mañá poñerán estes feitos en coñecemento da Fiscalía ante a pasividade tanto da Confederación como do actual goberno.

TEMOS DEREITO Á REDE WIMAX

2009-07-28T22:50:00.003+02:00

O Consello Comarcal do BNG de Lugo-Sul, non comprende nin acepta á decisión de anular o previsto servizo de Banda Larga para as comarcas de Lemos e Chantada. As recentes declaracións da Delegada Territorial da Xunta de Galicia sobre a ineficacia desta tecnoloxía, correxindo a explicación anterior que se basaba en supostos incumprimentos da empresa adxudicataria, non fan máis que confirmar que estamos a padecer medidas pouco meditadas de quen semella descoñecer do que está a falar e o que é pior, as consecuencias das decisións que toma.

O acceso a internet no 2009 non é un luxo. Esiximos que non se nos despoxe dun instrumento fundamental para o desenvolvemento rural, vital para as empresas, autónomos, estudantes, demandantes de emprego, para o Turismo, así como para un servizo de teleasistencia aos nosos maiores, nesta zona economicamente deprimida e cunha alta taxa de envellecemento poboacional.

Non nos vale o recurso a un futurible plan non concreto de Banda Larga para toda Galicia fronte ao que xa era unha realidade con dotación orzamentaria dispoñíbel e comprometida e, ademais, cunha experiencia práctica que avala o funcionamento deste sistema.

Por este motivo, o luns 27 de Xullo, ás 12:00 horas, no portelo único do Concello de Monforte de Lemos, procedeuse ao rexistro dunha carta (previamente enviada por fax) dirixida á Delegada Territorial da Xunta de Galicia en Lugo, Raquel Arias Rodríguez, que se fai pública unha vez enviada. Acceso á carta aquí.

POLA LINGUA, POLO EMPREGO

2009-07-13T12:41:00.002+02:00

Participa na manifestación do Día da Patria, 25 de Xullo.
Haberá un BUS gratuito dende Monforte, para o que te podes anotar no teléfono 982416027 ou enviando un correo a benegasober@hotmail.com.
Para XANTAR connosco, podes recoller un ticket no local comarcal do BNG, aboando 20 €.

ENSINO PÚBLICO, EN GALEGO E DE CALIDADE

2009-07-08T15:16:00.004+02:00

O BNG de Sober presenta unha moción para instar á Xunta de Galicia a manter a gratuidade dos libros de texto no ensino obrigatorio para o vindeiro curso académico.

O Partido Popular anunciou que suprimirá o sistema de préstamo gratuito de libros escolares, sustituíndoo por axudas directas para a adquisición de material que son moi reducidas.
O PP disfraza a medida de “progresista”, alegando que pagarán os libros as familias que poidan permitirse ese gasto, pero o certo é que a maioría das familias van ter que afrontar gastos moi elevados no material escolar; só as familias por debaixo do umbral da pobreza terán dereito ao 100% das axudas.
O ensino básico é obrigatorio e gratuito, logo o material didáctico tamén debería ser gratuito para tod@s. Trátase de xustiza e igualdade, non de caridade. A medida que favorecería á maioría social sería aplicar impostos progresivos segundo a renda, algo que o PP non está disposto a levar a cabo.
AS MEDIDAS DO PP CONTRA O ENSINO PÚBLICO
Coas primeiras medidas de goberno, o PP amosa que non lle interesa o ensino galego de calidade e busca a súa privatización: eliminación da gratuidade dos libros, supresión das axudas aos movementos de renovación pedagóxica, incremento de agrupamentos de alumnado de diferentes niveis educativos, falla de medidas para mellorar o ensino no rural, eliminación dos contidos de carácter galego na FP ou imposición dun modelo educativo que non garante que os estudantes teñan competencia en galego ao rematar os estudos.

EXEMPLOS PRÁCTICOS - AXUDAS POR TIPO DE FAMILIA
*** Familia monoparental, cun fillo/a e ingresos de 1.300 euros mensuais.
Ingresos familiares: 1.300 euros x 14 pagas = 18.200 euros anuais
Membros unidade familiar = 2
Ingresos anuais por persoa = 18.200 euros / 2 = 9.100 euros
NON ten dereito a ningún tipo de axuda.
*** Familia monoparental, cun fillo/a e 1,5 veces o Salario Mínimo Interprofesional.
Ingresos familiares: 7.381,33 euros x 1.5 = 11.072 euros anuais
Membros unidade familiar = 2
Ingresos anuais por persoa = 11.072 euros / 2 = 5.536 euros
Só ten dereito ao 50 % de axuda.
*** Familia mileurista cun fillo/a.
Ingresos pai: 1.000 euros brutos mensuais
Ingresos nai: 1.000 euros brutos mensuais
Ingresos familiares: 2.000 euros x 14 pagas = 28.000 euros anuais
Membros unidade familiar = 3
Ingresos anuais por persoa = 28.000 euros / 3 = 9.333 euros
NON ten dereito a ningún tipo de axuda.
*** Familias por debaixo do umbral de pobreza
7.203,3 euros por persoa. Non está publicado o dato para 2009, pero, seguindo a tendencia dos anos anteriores, poderiamos estimalo en 7.926 euros anuais aproximadamente.
Familias con ingresos anuais por persoa entre 5.400 euros e 7.926, só terían dereito ao 50 % da axuda.
*** Familias con salario medio
1.496 euros mensuais (Galicia).
Familias monoparentais cun fillo/a e con ingresos correspondentes ao salario medio NON terían dereito a ningún tipo de axuda.
Ingresos familiares: 1.496,2 euros x 14 pagas = 20.947 euros anuais
Membros unidade familiar = 2 (Con dous fillos/as: só 50% da axuda).
Ingresos anuais por persoa = 20.947 euros / 2 = 10.473 euros
Se a familia estivese composta por dous adultos con ingresos medios (1.496 euros/ brutos mes), tería que ter tres fillos/as para ter dereito ao 50 %, e só no caso de que tivese 6 fillos/as teria dereito ao 100 % da axuda.

É PRECISO COÑECER O WIMAX

2009-07-06T12:01:00.004+02:00

O BNG de Sober solicita que o goberno municipal se informe sobre a rede de Internet sen fíos WIMAX agora que está a piques de rematar o prazo para que a empresa adxudicataria deste servizo finalice os traballos de construcción desta infraestructura no sur de Lugo.

O acceso a Internet é un servizo moi demandado pola xente do rural, sobre todo por empresas, autónomos e estudiantes que neste momento non dispoñen da posibilidade dun acceso digno á Rede, así como tamén é unha ferramenta con moitas potencialidades no eido da mellora da asistencia ás persoas maiores; deste xeito, é urxente a posta en marcha do servizo, pero tamén o é divulgar as súas prestacións e funcionamento entre toda a cidadanía para mellor aproveitar esta tecnoloxía.

Así, o BNG considera que é moi importante aproveitar este verán, momento en que acoden ó noso concello gran número de visitantes, para publicitar un servizo que vai ser un atractivo máis da zona a ter en conta para captar posibles novos residentes.

Para que o Concello poida divulgar mellor este servizo, solicitamos que o Grupo de Goberno Municipal se entreviste ca Secretaria Xeral de Modernización e Innovación Tecnolóxica para informarse sobre a rede WIMAX.

DEFENDE A TÚA LINGUA

2009-06-12T13:38:00.003+02:00

Polo ensino en galego.
Cando cubrades a enquisa do galego no ensino…

Marcade a opción “galego” (en Infantil e FP) e “todo en galego” (en Primaria e Secundaria), estarían a indicar que queremos en galego as materias que hoxe se deben impartir na nosa lingua, tal e como indica o decreto en vigor. Non significaría, por tanto, que optemos por todo o ensino en galego, pois esta opción non se considera. [Coa enquisa que se envía ao centros o mantemento deste equilibrio tan só se garantiría marcando a resposta “en galego” ou “todo en galego”. Esta opción non se refire á totalidade do ensino, senón ás materias que habería que impartir hoxe en galego –o 50%- xa que a enquisa non recolle a opción de que todas as materias agás as linguas, poidan ser impartidas en galego.]

En observacións podedes escribir:
*** Desexaría que o ensino fose en galego, unha opción que non recolle esta enquisa.
***Estou a favor da aplicación do decreto actual de promoción e uso do galego no ensino, realizado co consenso da comunidade educativa e que emana do Plan Xeral de Normalización da Lingua Galega, aprobado por unanimidade no Parlamento Galego.
***Todo o anterior fai que os resultados desta consulta non me parezan lexítimos.

SÓ CO BNG GALIZA CONTARÁ EN EUROPA

2009-05-22T10:00:00.001+02:00

www.imosaeuropacobng.eu

O GALEGO: A NOSA COLUMNA VERTEBRAL

2009-05-15T19:10:00.002+02:00

GUILLERME VÁZQUEZ: PORTAVOZ NACIONAL

2009-05-11T12:51:00.005+02:00

11-maio-2009

Tras o proceso asambleario vivido no BNG durante os pasados dous meses, Guillerme Vázquez, candidato á Portavocía Nacional pola Alternativa pola Unidade vén de ser elixido Portavoz Nacional do BNG co 55% dos votos fronte ó 44,9% dos votos obtidos pola outra candidatura, a de +BNG, encabezada por Carlos Aymerich.

A nova Executiva Nacional está composta por: Guillerme Vázquez, Ana Pontón, Francisco Jorquera, Rosana Pérez, Francisco Rodríguez, Montse Prado, Rafa Villar, Francisco García, Carlos Aymerich, Teresa Táboas, Manuel Antelo, María Méndez, Xoan Bascuas, Ana Luisa Bouza e Gonzalo Constenla.

O Consello Nacional, máximo órgano do BNG entre Asambleas, quedou constituído polos representantes eleitos entre as catro candidaturas que se presentaban: APU (23 representantes), +BNG (18), Encontro (7) e Máis Alá! (2). O Consello Nacional completarase cos representantes das Asambleas Comarcais.

Na Asamblea Nacional Extraordinaria participaron 2.500 delegad@s que debateron e aprobaron un Documento Político que será a guía do nacionalismo galego ata a vindeira Asamblea Ordinaria.

EPIDEMIA DO LUCRO

2009-04-29T14:37:00.002+02:00

Epidemia do Lucro, un artigo de Silvia Rivero (aquí).

NON DEIXO DE PENSAR EN FALUYA

2009-04-12T13:50:00.004+02:00

Cinco anos despois, unha testemuña da destrucción de Faluya, cámara de Al-Jazeera, conta o que viu [aquí].

Un día, creo que o 9 de abril de 2004, alguén dixo desde un altavoz da principal mezquita de Faluya: “Os estadounidenses abrirán unha porta e mulleres e nenos poderán marchar (da cidade)”. En cuanto acabou, todas as mulleres e nenos de Faluya trataron de atopar un coche para abandonar a cidade, pero cando estaban na rúa, as forzas estadounidenses abrieron fogo.

Laith Mushtaq

¿Como nos envelenan?

2009-04-06T14:33:00.003+02:00

A seguridade alimentaria en mans das multinacionais (aquí).

Comer é unha cuestión política.

O CONSORCIO DE TURISMO DA RIBEIRA SACRA DEBE CAMBIAR

2009-03-14T13:34:00.005+01:00

· O fracaso do Consorcio de Turismo da Ribeira Sacra.

Atendendo a algunhas iniciativas e ás publicacións promovidas polo Consorcio de Turismo da Ribeira Sacra percíbese unha idea do Turismo como mera actividade económica, como se se aceptase acriticamente o aumento da actividade turística como positivo en sí, sen cuestionarse a interacción do Turismo co Medio Ambiente, co Patrimonio ou con outras actividades económicas que non sexan as directamente relacionadas.
Á luz das auténticas barbaridades sobre a Historia comarcal e os aspectos patrimoniais que se repiten unha e outra vez en publicacións subvencionadas por cartos públicos intúese que o Consorcio Turístico da Ribeira Sacra ten un concepto folcklórico do Patrimonio; o Patrimonio entendido soamente como elemento pintoresco para o desfrute turístico, sen importar cometer graves erros históricos ou ignorar as tradicións propias e xenuinas deste territorio suplantándoas por inventos ou por elementos que, aínda que poderían ter parte de verdade, son dificilmente verificables historicamente.
Para O BNG DE SOBER, o legado que deixa o Consorcio de Turismo da Ribeira Sacra é pobre, falto de imaxinación e despilfarrador de cartos públicos, como a ruta das Igrexas luciérnagas ou o parque multiaventura en Escairón, que se pretendía facer en plena Devesa, ou a intención de iluminar o embalse de Belesar, símbolo de destrucción da nosa paisaxe para beneficiar a intereses alleos. Para O BNG DE SOBER, o prioritario tiña que ter sido a racionalización da excesiva e ambigüa sinalización de pobos, vías de comunicación e recursos turísticos, os estudos rigurosos sobre o Patrimonio, as actuacións de sensibilización, coñecemento e coidado do inmenso Patrimonio Natural, a recuperación do Patrimonio Inmaterial nunha comarca envellecida e a integración da sociedade no proxecto turístico.
O fundamental para O BNG DE SOBER sería elaborar un sensato e consensuado Plano de Desenvolvemento Turístico da Ribeira Sacra, no que se integren TURISMO-VIÑO-ARTESANÍA-INFRAESTRUTURAS-HISTORIA para que o Turismo se convirta nun sector económico puxante, que sexa unha fonte de riqueza para toda a poboación, un estímulo para o desenvolvemento acorde co Medio Ambiente e unha oportunidade para profundizar na fecunda e descoñecida Historia do noso pobo.

* Exemplos de graves carencias e erros na web do Consorcio de Turismo da Ribeira Sacra.

- Non se indican fitos arqueolóxico-artísticos importantes no apartado QUE VER.
- A información é moi sesgada e incorrecta nalgúns casos (etiquétanse todos os castros como “celtas”, petroglifos de Coviñas dos Toxos, en lugar de Os Toxaes, restos de grandes casas de planta circular en Proendos!!!, etc.). En Sober non se menciona nin unha soa igrexa románica e só se citan tres puntos de petroglifos, sen ningún criterio de selección serio e, por riba, con erros nas súas denominacións. O interesantísimo Románico de Chantada non existe por ningures. En Monforte só se sinala o conxunto de San Vicente no apartado de Patrimonio. De Pantón só se sinala o Mosteiro das Bernardas.
- Son algúns exemplos de graves carencias que fan do mapa que resume o Patrimonio da Ribeira Sacra na web do Consorcio unha auténtica afrenta para a xente que vivimos nunha comarca ca maior concentración de Arte Románica de Europa e con múltiples e interesantes recursos arqueolóxico-artísticos de distintas épocas.
- As fotografías son escasas e pouco representativas (en Sober só aparecen 4 imaxes, todas da zona da ribeira; do Saviñao só se mostran dúas fotos).
- O mapa orientativo é pouco concreto.

A INFORMACIÓN É ESCASA, OMITINDO IMPORTANTÍSIMOS FITOS HISTÓRICO ARTÍSTICOS (petroglifos, castros, igrexas románicas, casas grandes, elementos etnográficos...), ESTÁ MAL PLANTEXADA E CONTÉN ERROS GRAVÍSIMOS.

Por todo isto, consideramos unha burla para a xente da Ribeira Sacra que a imaxe exterior da zona sexa monopolizada polo Consorcio Turístico da RS tal e como está plantexado. Así, o BNG DE SOBER formulou un ROGO no pleno ordinario do Concello de Sober celebrado o venres, 13 de marzo de 2009, para que o Pleno adoptase o seguinte ACORDO (o Pleno non se pronunciou):

1. Que o Concello de Sober, en tanto que membro do Consorcio Turístico da Ribeira Sacra impulse os seguintes cambios no seu funcionamento:

a) Apertura do Consorcio á sociedade; contacto e integración das asociacións e xentes preocupadas por poñer en valor o Patrimonio da zona en todos os sentidos.
b) Asesoramento de especialistas (biólogos, xeógrafos, lingüistas, historiadores, arqueólogos…).
c) Implicación de toda a sociedade na creación dun portal web da Ribeira Sacra, completo e visual, e dunha guía turística das mesmas características.

2. Que o Concello de Sober conmine ós responsables da web do Consorcio Turístico da Ribeira Sacra a que se corrixan os graves erros na información que se dá sobre Sober.

GRACIAS E ÁNIMO

2009-03-04T12:04:00.001+01:00

Esta é unha mensaxe para tod@s @s que siguen crendo que "a forza de tanto amor non pode ser inútil".

O PP GAÑA AS ELECCIÓNS GALEGAS

2009-03-02T09:56:00.004+01:00

O PP obtén a maioría absoluta no Parlamento Galego con 39 deputados, dous máis que no 2005 conseguidos un na Coruña, onde baixa o BNG, e outro en Pontevedra, a costa do PSdG-PSOE. O PSdG-PSOE queda con 24 e o BNG con 12.

· Resultado en Galicia (aquí).

· Resultado na Comarca de Lemos (aquí).

· RESULTADOS EN SOBER - GALEGAS 2009

- Censo electoral (sen CERA) - 2.502.
[2005: 2.833]

- Votos nulos - 11
- Votos en branco - 22
[2005: en branco + nulos - 33]

- Abstención - 20,54 %
[2005: 24,2%]

- PP - 1.323 - 67,6%
[2005: 1.412 - 67%]

- PSOE - 369 - 18,8%
[2005: 461 - 22%]

- BNG - 245 - 12,5%
[2005: 230 - 11%]

- UPyD - 4

- IU - 4

- TEGA - 2

- Outros - 8
[2005: outros - 10]

O PP ven acadando en Sober os seus mellores resultados nos anos de eleccións autonómicas; nesta ocasión, mantén a ampla maioría, subindo 0,6 puntos con respecto ó 2005, a pesar da perda de 89 votos.

O PSOE, que acadara en 2005 un dos seus mellores resultados nunhas autonómicas, co 22% dos votos, descende ata o 18,8%, perdendo 92 votos, que segue sendo un resultado superior a anteriores comicios.

O BNG é a única forza política de Sober que ascende en votos, 15 máis que no 2005, acadando o 12,5% dos sufraxios, cunha suba do 1,5%, mais aínda a medio cento de votos con respecto ás eleccións galegas de 1997 e 2001, nas que o BNG en Sober superara o 14% dos votos a candidaturas.

* RESULTADOS POR MESAS ELECTORAIS

· SOBER
PP – 258 – 68%
PSOE – 73 – 19,2%
BNG – 48 – 12,6%

· NEIRAS
PP – 154 – 67%
PSOE – 44 – 19 %
BNG – 32 – 14%

· CANAVAL
PP – 110 – 56,4%
PSOE – 46 – 23,5%
BNG – 39 – 20,1%

· DOADE
PP – 136 – 71,3%
PSOE – 41 – 21,4%
BNG – 14 – 7,3%

· LOBIOS (+ BULSO)
PP – 166 – 78,3%
PSOE – 26 – 12,2%
BNG – 20 – 9,5%

· BOLMENTE
PP – 180 – 77,2%
PSOE – 30 – 12,8%
BNG – 23 – 10%

· ANLLO
PP – 203 – 65,4%
PSOE – 63 – 20,3%
BNG – 44 – 14,3%

· ROSENDE
PP – 116 – 62%
PSOE – 46 – 24,5%
BNG – 25 – 13,5%

CON VALENTÍA, SEN ATADURAS

2009-02-22T00:01:00.000+01:00

Queremos máis avances!

O 1-M, VOTA BNG.

NON PODE SER!!!

2009-02-17T00:58:00.002+01:00

Temo moito que se me deixo levar polo xenio e este xornal ten a ben publicar estas liñas, a xente me poida sinalar pola rúa, dicíndome: ¡inocente, inocente! Imos, logo, a tomalo como o que é, un exercicio de humor co que, con cartos públicos, o PDT do Consorcio Turístico Ribeira Sacra nos agasalla na súa web co fin de paliar estes tempos de crise. Invito aos lectores a cliquear no icono de Sober (valeríame calquera outro concello da Ribeira Sacra) e, nada, a desfrutar. Entre outras cousas enterarémonos de que merece a pena visitar as adegas tradicionais da Casa Reitoral de Amandi e a alfarería tradicional e industria do cobre O Forno do Alfareiro de Gundivós; de que nas parroquias de Canaval, Sober e Gundivós aínda hoxe continúan a súa labor algunhas empresas adicadas á producción tradicional de tella e ladrillo e industrias adicadas ó traballo do cobre co que se dá forma a moitos dos alambiques e alquitaras onde se preparan as deliciosas cañas coas que nos poñemos cegos – engado eu. Enterarémonos de que podemos visitar os santuarios da Virxe de Cadeiras, o de Pinol, e o de San Pedro e o de Amandi, situados, coma miradoiros privilexiados, nos outos da ribeira. Despois de unha ilustrada exposición histórica, enterarémonos, ¡ollo!, de que en Proendos poderemos admirar parte do muro que rodeaba a cidade de Proencia, así como restos de casas, especialmente algunhas de planta circular de gran diámetro e de que - esto sí que é bo – se espolvoreaban as pezas da cerámica de Gundivós con po de peixe que, ao lume, lle dá un acabado negro brillante e lle confire un sabor especial ás bebidas. E todo esto, non nun voluminoso libro papel biblia, non, todo esto en apenas unha folliña electrónica de nada. ¡Noraboa! Como titulaba El Jueves a raíz dos rumores sobre a relación dun ínclito presidente do goberno e unha famosa actriz española: ¡¡¡NO PUEDE SER!!!

ALFONSO CAMPOS PÉREZ, voceiro municipal do BNG.

Febreiro de 2009.
_____________

Xa sabedes. Se queredes rir un cacho: visitade http://www.ribeirasacra.org/turismo/ga/web/index.php, picade no apartado QUE VER, en calquera Concello, e lede un pouco procurando non atragantarvos con tanta burrada unha tras outra*.

¡¡¡UNHA BURLA A TODA A XENTE DA RIBEIRA SACRA!!!

Con cartos públicos.

Difúndeo.

* Que conste que non nos estamos a meter con ningún traballador, senon cos responsables políticos de tal desaguisado, no caso de Sober, co representante do Concello no Consorcio, por permitir este despropósito.

O IDIOMA É A CHAVE

2009-02-08T15:10:00.001+01:00

O idioma é a chave
coa que abrimos o mundo:
o salouco máis feble,
o pensar máis profundo.

O idioma é a vida,
o coitelo da dor,
o murmurio do vento,
a palabra de amor.

O idioma é o tempo,
é a voz dos avós
e ese breve ronsel
que deixaremos nós.

O idioma é un herdo,
patrimonio do pobo,
máxicamente vello,
eternamente novo.

O idioma é a patria,
a esencia máis nosa,
a creación común
meirande e poderosa.

O idioma é a forza
que nos xungue e sostén.
¡Se perdemos a fala
non seremos ninguén!

O idioma é o amor,
o latexo, a verdade,
a fonte que agroma
a máis forte irmandade.

Renunciar ao idioma
é ser mudo é morrer.
¡Precisamos a lingua
se queremos vencer!

Manuel María